ليه ما تروحش لدكتور نفسي ؟
بستغرب جدًا لما ألاقي ناس بتعاني من مشاكل نفسية واضحة وضوح الشمس إنها مرض نفسي ومع كده لا تلجأ للطبيب النفسي و تقرر تفسير مشكلتها بأي شكل تاني غير الطب النفسي…
الحزن الطويل اللي من غير سبب.. الشعور بالضياع.. القلب المهموم طول الوقت.. عدم الثقة بالنفس.. والغضب الشديد في أوقات والاستسلام في أوقات تانية.. كل ده لما يتجمع مع بعضه يبقى أسمه “اكتئاب”.. وده مرض نفسي.. ليه علاج والعلاج يساعد في حل المشكلة …
سماع الأصوات.. والأفكار الخاطئة.. والضلالات.. مش معناه إنك حد عامل لك عمل أو لابسك جن.. ده معناه مرض نفسي أسمه “شيزوفرينيا”.. وفي علاج قادر إنه ينهي معاناتك …
الشك القاتل في كل شيء.. الحيرة الشديدة.. إعادة التأكيد على الأشياء أكتر من مرة رغم تأكدنا من قبل إنها صحيحة.. مرض نفسي.. أسمه “الوسواس القهري”.. وبرضه ليه علاج…
الكثير والكثير من آلامنا اليومية هي أمراض نفسية.. طبعا في فرق كبير بين القلق العادي اللي بيواجهنا والمشاعر المختلفة اللي ذكرت البعض عنها وما يزيد بشكل يصل إنه مرض نفسي ودا في النهاية ؛ تقدير طبيب.
احنا في القرن الواحد والعشرين.. ربع الناس في أوروبا وامريكا بيزوروا الطبيب النفسي بانتظام علشان الطب النفسي علم مهم وبيساعد بشر كتير ع الحياة السليمة..
المرض النفسي مش عيب.. وعلاجه سهل وبسيط.. ما تخافش من الوصمة.. روح للطبيب النفسي لو شعرت إنك محتاج أو بتواجه مشكلة ودا اللي بنحاول نعمله من خلال المبادرة اللي اطلقتها “معا من أجل ثقافة صحية” واللي الهدف منها نشر الوعي الصحي بين الناس
لا تعليق